الحاجة “عطيات” ومؤامرات القمة العربية

صرح السيد وليد المعلم وزير خارجية سوريا بأن أمريكا تتآمر لإفشال القمة العربية فى دمشق، ومساعدة للشقيقة سوريا فأنا على استعداد لكى أطالب الرئيس بوش بالتوقف عن التآمر على قمة دمشق، ولدي ثقة أنه سوف يستمع إلىّ فأنا لى أفضال كثيرة على بوش أبسطها أننى أعطيته صوتى فى فترة ولايته الثانية كما أنى زميله فى الحزب الجمهورى، لذلك فأنا واثق بأن بوش سوف يتوقف فورا عن تآمره على قمة دمشق، ولكن ماذا سيحدث بعد أن يتوقف التآمر؟ هل سيقرر القادة العرب إصدار قرارات غير الشجب والتنديد والتأييد والصمود؟ هل سوف يبدأون بإصدار قرارات من الممكن أن تمس وتحسن من معيشة المواطن العادى؟ هل سيسمحون بإنتقال الأفراد والبضائع بحرية مثل أوروبا الموحدة؟ هل سوف يسعون لأن يصبح لدى العرب عملة موحدة؟هل سوف تسارع الجيوش العربية لنجدة الشعوب العربية الأخرى فى حالة تعرضها للغزو؟وإذا توقف التآمر الأمريكى الصهيونى والغربى، هل سيتوقف التآمر العربى العربى؟ وهل ستتوقف الإغتيالات العربية العربية؟ وهل ستتوقف التفجيرات العربية العربية؟ أجيبونا يأولى الألباب!!

فى الحقيقة القمة العربية أصبحت تشكل لغزا بالنسبة لى، وأستطيع القول أنها أصبحت تشكل لغزا بالنسبة لمعظم مواطنى الشعوب العربية الغلابة والغير غلابة، فلا أدرى لماذا تنقعد ولماذا تنفض ولماذا العراك قبل وداخل وبعد كل قمة؟ وكأن هذه القمة أو تلك سوف تحضر (الديب من ديله)، ولكى أخرج من تساؤلاتى قررت أن أتحدث مع قارئة الفنجان لكى أعرف منها ماسوف يدورفى القمة العربية المقبلة، وأنشرها على العالم، وكفى الله المؤمنين شر القمم، ولا داعى لأن يتعب زعماء العرب أنفسهم ويذهبون إلى دمشق، وأنا أعرف أن بعضهم لا يحب أن يدخل على الرئيس الأسد (بإيده فاضية)، وأن البعض سوف يدخل قاعة الاجتماعات شايل بطيخة، والآخر سوف يحضر معه “مشنة” عيش لحل أزمة الخبز الحالية، وبعض الأخوة الأعداء سوف يحضرون ومعهم أحدث الطرق لتفجير السيارات فى الأصدقاء والأعداء على حد سواء، ونحن نريد توفير مشقتهم، ونقول لهم عن “إللى فيها”.

واتصلت بقارئة الفنجان (الحاجة عطيات) على تليفونها الموبايل السرى، وطلبت منها موعدا ودار بيننا الحوار التالى:

– إزيك ياحاجة

– أيوه مين معايا وجبت نمرة التليفون من مين، ده ما حدش يعرفها إلا الرؤساء والناس الكبار

– إللى يسأل ما يتوهش ياحاجة

– وإنت مين بسلامتك بقى؟

– أنا سامى البحيرى

– وأنت بتبيع إيه؟

– أنا بأشتغل مهندس طول اليوم وكاتب من منازلهم بالليل وعاوز آخد ميعاد معاك عشان موضوع مهم

– أنا مش حأقدر أأشوفك قبل شهر رمضان

– لأ أنا فى عرضك ده مؤتمر القمة على الأبواب وعاوز أعرف إيه إللى حيحصل فيه قبل إنعقاده علشان أنشرالأخبار على الملأ وبهذا نوفر على رؤسائنا (الأعزاء) و (الخالدين) وعثاء السفر (حلوة وعثاء دى)!!
– خلينى أبص كده فى الكومبيوتر قدامى علشات أعرف (الكاليندر) بتاعتى الشهور الجاية

(فقلت فى نفسى: الحاجة عطيات الظاهر بقت تشوف الفنجان بالكومبيتر يبقى القيامة قربت)

– أصل إنت عارف الناس دلوقت إقبالها بقى جامد قوى على قراءة البخت ومعرفة الطالع وإحنا بقينا أملهم الوحيد فى المستقبل

– الله يخليكى شوفى ميعاد قريب

– فى الحالة دى ضرورى تدفع كشف مستعجل

– وده بكام يا ترى؟

– الكشف المستعجل ب 900 جنيه غير ضريبة المبيعات

– وإنتى بتدفعى ضريبة مبيعات؟

– المحامى إللى قدامى (برعى السرياقوسى) الله يخرب بيته بلغ عنى الضرايب، ومن ساعتها حاطين مخبرين ضرايب مبيعات يعدوا علىّ الداخل والخارج من بيتى

– بس ياحاجة عطيات 900 جنيه كثير قوى

– أنت حتفاصل معايا، هو أنا باأبيع ترمس، والله مش عاجبك شوف غيرى

– لأ أشوف غيرك إزاى، وبعدين أنا لسه حأسافر من أمريكا علشان أشوفك

– لو إنت عايش فى أمريكا أنا عندى ليك فكرة هايلة أنا ممكن أشوف لك الفنجان بالإنترنت، مش إنت عندك كومبيوتر وديجيتال كاميرا

– أيوه

– يبقى خلاص، عن طريق (ياهو) ندخل على الإنترنت أنا وأنت وبالويب كاميرا ممكن أقرأ لك الفنجان

– وده يطلع بكام؟

– مش كثير ثلات آلاف جنيه بس شامل ضريبة المبيعات

– يا نهار أسود ثلاث آلاف جنيه حتة واحدة

– مش حاأوفر عليك تكاليف السفر من أمريكا لمصر، تحب تدفع بالفيزا ولا الماستر كارد ولا أمريكان إكسبريس!!

– – أمرى لله؟ والموعد حيكون إمتى؟

– – ممكن نعمله بكرة الساعة واحدة الضهر بتوقيت القاهرة يعنى الساعة سبعة الصبح بتوقيت شرق الولايات المتحدة

– إنتى عارفة الحاجات كلها منين ياحاجة عطيات

– مع نظام العولمة الجديد أصبح نص زباينى من خارج مصر والإنترنت زودت شغلنا قوى، هو إسمه إيه إللى إخترع الإنترنت ياباشمهندس، ده أنا نفسى أروح أدعى له وأولع له شمعتين جنبى هنا فى جامع السيدة زينب

– ياستى إللى أطلق الإنترنت فى العالم واحد إسمه سى آى أيه

– بكرة بعد صلاة العشاء حاأروح أولع شمعتين لسى آى إيه ده

– خلاص نشوفك بكرة ياحاجة فى الإنترنت على ياهوه دوت كوم!!

وفى الصباح صحيت مبكرا وصنعت لنفسى فنجان قهوة تركى مضبوط، وتشاءمت بعد أن طلعت القهوة بدون (وش) وأنا عندى إثنين من البنات وقهوة بدون (وش) تعتبر فألا سيئا وخاصة فيما يتعلق بمسألة زواج البنات، ماعلينا، بعد أن شربت فنجان القهوة التركى قلبته رأسا على عقب فى صحن الفنجان الصغير، وجهزت الكومبيوتر والويب كاميرا والميكروفون والسماعات، وكل شئ أصبح جاهزا لعمل إجتماع بالفيديو مع الحاجة عطيات قارئة الفنجان.

…

– أيوه ياحاجة عطيات، شايفانى؟

– أيوة أنا شايفاك، وأنت شايفنى؟

– ده إيه الجمال ياحاجة، ده أنا كنت متوقع واحدة أكبر بكثير.

– سيبك من البكش ده ياباشمهندس، إيدك على التلات آلاف جنيه، كام رقم الفيزا؟
(وأعطيتها رقم الكارت وكافة بياناته)

– أيوه يا باشمهندس حط فنجانك قدام الويب كاميرا.

– شايفة الفنجان كويس

– أيوه شايفاه كويس، إيه طلباتك ياحبيبى؟

– أنا عاوز أعرف إيه إللى حيحصل وراء كواليس القمة العربية

– قدامك سكة سفر

– سكة سفر إيه ياحاجة؟غيرى الشريط، إحنا بنتكلم عن القمة العربية

– لا مؤاخذة ممكن تقرب الفنجان تانى من الويب كاميرا عشان أتأكد

– إتفضلى ياستى

– ياساتر يارب

– إيه خير؟

– أنا شايفة مؤامرات كثيرة قوى

– ايوه كده خللى الكلام يحلو

– ومين ياترى بيتآمر على مين؟

– أنا شايفة واحد لابس برنيطة زى مايكون خواجة وراكب حصان وفى إيده كرباج

– وده يطلع مين بقى؟

– مش عارفة

– آه أنا شايفاه لابس قميص مقلم أحمر فى أبيض فى أزرق وعليه شوية نجوم بيضاء

– خلاص عرفته

– بجد عرفته ياباشمهندس، وده يطلع مين بقى؟

– أنا دافع لك ثلاث آلاف جنيه عشان تسألينى؟!! ده ياستى الخواجة بوش والظاهر إنه بيتآمر على إفشال القمة

– إستنى… أنا شايفة واحد تانى أقصر من الأولانى ولابس على رأسه طاقية صغيرة سودة

– آه عرفته

– بجد مين ده ياباشمهندس؟

– شوفى ياحاجة مش حأقولك إلا لما ترجعى لى ألف جنيه؟

– موافقة مين ده بقى؟

– آه ده ياستى الخواجة أولمرت رئيس وزراء إسرائيل

– شوفى مين كمان بيتآمر على القمة؟

– آه فيه واحد طويل وعلى راسه عمة كبيرة سودة

– بصى كويس ليه دقن؟

– مش باين، عندك كشاف توجهه ناحية الفنجان شوية، آه كده كويس ليه دقن كبيرة قوى وبيضاء، ده مين بقى ياباشمهندس؟

– يبقى كده عليكى ألفين جنيه

– موافقة

– ده بالوصف إللى بتقوللى عليه ده يطلع الأمام الخمينى

– خمينى إيه إنت بتضحك علىّ، مش بيقولوا الخمينى ده مات

– الظاهر إنه رجع مخصوص عشان يخلص على القمة العربية، مين كمان هناك؟

– فيه عيال كثير بيحدفوا طوب على مؤتمر القمة ودول يطلعوا مين ياباشمهندس؟

– كده يبقى عليكى تلات آلاف جنيه، دول ياستى أطفال حجارة الإنتفاضة الأولى كبروا ومش عاجبهم الحال

– بأقولك إيه ياباشمهندس إنت باين عليك إبن حلال وفاهم فى كل حاجة، إيه رأيك تسيبك من الهندسة
والكتابة، وتيجى تشتغل معايا فى قراءة الفنجان، وحتكسب دهب؟

– بس أنا عايش فى أمريكا

– مش مهم إنت تمسك فرع أمريكا، وبعد شوية نعملها فرانشايز؟

– أنا موافق، بس عاوزك ترجعى لى التلات آلاف جنيه إللى دفعتهم فى أول المقابلة، وبعدين عليكى تلات
آلاف جنيه إستشارة، وممكن أبدأ معاك من بكرة.

– أنا موافقة، على بركة الله

…..

ولم أصدق أنى طلعت الحاجة عطيات مديونة.

…..

وبمناسبة القمة العربية القادمة، أسفله رابط عليه البيان الختامى لمؤتمر القمة الماضى، ما عليك إلا أن تضع دمشق مكان الرياض، وتغير التواريخ، وتضع رقم القمة ال 20 بدلا من 19، وعدا هذ يبقى كل شئ بدون تغيير!!
اضغط هنا

com.aol@samybehiri

* كاتب مصري – الولايات المتحدة

المصدر ايلاف