أنا وأخويا على إبن عمى

“أنا وأخويا على إبن عمى وأنا وإبن عمى ع الغريب” يؤسس هذا المثل الشعبى ويلخص جزء لا يستهان به من الثقافة العربية ، وكذلك تبنى عليه أحيانا السياسات والحروب العربية – العربية.

وأنا لا أدرى أصل المثل ولكنى أتصور أن يكون أصله بدوى وقبلى ، وأنا أكاد أجزم أن المثل ناقص شطره الأول ، فلا بد وأن يتدرج المثل قائلا:
“أنا على أخويا… وأنا وأخويا على إبن عمى …وأنا وإبن عمى ع الغريب” ، وقد قررت أن أجرب تطبيق هذا المثل على علاقتى الأسرية والإجتماعية ، فبعد معركة أخوية بينى وبين أخى الأكبر أسفرت عن وقوع بعض الضحايا من القتلى والجرحى ، إجتمعت مع أخى فى وجود أفراد من العيلة وقررنا “حقن الدماء الأخوية” والتفرغ لمسيرتنا النضالية الحقيقية .

…

وبعد فترة من الهدوء النسبى إتصلت بأخى وأخبرته بأننى أريد أن أكلمه فى موضوع مهم ، و ذهبت إليه فى مقره الصيفى ، وقابلنى بالترحاب وعزفت الموسيقى السلام الأخوى البحيرى ، وأخذنا بعض بالأحضان وتناسينا القتلى والجرحى من الجانبين لأننا كما ذكرت قد تفرغنا لمسيرتنا النضالية والتحدى (تحدى لإيه بالضبط ؟ مش عارف ، ولكن أهو تحدى والسلام) .
وبادرته أثناء إجتماعه به:
– عاجبك إللى بيعمله إبن عمك ده ؟
– إيه خير هو عمل إيه؟
– أنا عارف بيعمل إيه ولا بيهبب إيه ؟
– فسر شوية ياخويا قصدك إيه ؟ هوعملك إيه بالضبط ؟
– طالع لى فيها كده… وعامل إن ما فيش حد مالى عينه ، الواد ده ضررورى يتربى .
– وأنا معاك ، صحيح أنا مش عارف هو عمل إيه بس معاك .
– أنا رأيى نستناه وهو راجع من وردية بالليل بتاعته ، ونفجر فيه عربية مفخخة .
– طيب وحنجيب العربية منين والمفرقعات منين ؟
– ما تقلقش أنا عندى عربية قديمة مستغنى عنها ، على أنبوبيتين بوتاجاز ، وطريقة عمل سيارات مفخخة موجودة وربنا يخللى لنا الإنترنت .
…
ووضعنا السيارة بجوار منزله ونفذنا تعليمات :”كيف تصنع سيارة مفخخة من المواد الأولية” . وأمسك أخى بمفتاح تفجير القنبلة عن بعد ، وفى جنح الظلام شاهدنا سيارته وهى تقترب من منزله ، ففجرت السيارة المفخخة وتطايرت السيارة المفخخة وتحطمت سيارة إبن عمى . وإختفينا تحت جنح الظلام ، ولم نعرف الخسائر بعد .
وإكتشفنا فى الصباح أن إبن عمى قد إصيب وأن بعض المارة قد سقطوا بين قتيل وجريح دون أن يكون لهم “لا فى الطو ر ، ولا فى الطحين” وحزن أخى وشعر بالذنب قليلا وهدأت من روعه وقلت له : “دى ضريبة النضال والكفاح ، لا بد أن يسقط ضحايا ، وخللى باللك إن إبن عمك كان بيدبر لنا عملية مماثلة ، فإحنا إتغدينا بيه قبل ما يتعشى بينا ”
وذاع الخبر وسط العائلة عن المعارك بيننا وبين إبن عمنا ، ومرة أخرى تدخل أولاد الحلال من العائلة وقرروا عمل “مصالحة عائلية” ، وتم عمل عزومة عشاء كبيرة فى دار كبير العيلة ، وبعد العزومة أصر كبير العيلة أن أبوس رأس إبن عمى لأن الجميع أجمعوا على أننى كنت البادئ بالعدوان ، وتحت ضغط العائلة قمت بالفعل و “بوست” رأس إبن عمى والذىقام من دوره وأعطانى حضنا كبيرا وسط تصفيق الحاضرين من أفراد العائلة ، وألقى كبير العيلة كلمة قال فيها ما معناه بأنه من العيب أن يقتل بعضنا بعضنا بينما يتربص بنا “الغريب” لكى يغتصب أراضينا وبيتونا ويجعلنا خدما له خاضعين له ، وأمن الحاضرون على كلمة كبير العيلة ، وتعاهدنا جميعا أن نقف صفا واحدا ضد مؤامرات “الغريب” وعدوانه .

….

وإجتمعت فى أعقاب ذلك مع أخى وإبن عمى ، ودار بيننا الحوار التالى:
إبن عمى: ضرورى نكون يد واحدة ضد الغريب .
أخى: تقصد مين الغريب بالضبط ؟
إبن عمى : أقصد كل الأغراب عننا .
أنا: عندنا أغراب فى الغرب وأغراب فى الشرق وأغراب فى بحرى وأغراب فى قبلى ، لا بد نحاربهم كلهم.
أخى: عاوزين تحاربوهم كده بدون مناسبة ؟
إبن عمى: السبب الرئيسى هو إن وجودهم خطر على وجودنا .
أنا: ده صحيح :” ياإحنا يا همه فى الناحية دى” .
أخى: مش ممكن ياجماعة المنطق ده ، ممكن نتعايش مع الجميع .
إبن عمى: ما فيش تعايش مع الغريب .
أنا : أنا شايف ياخويا إن منطقك سلبى وإنهزامى .
إبن عمى: أوعى يكون إشتروك عشان تكون فى صفهم .
أخى: يعنى هو إللى يقول الحق عندكم يبقى مرتشى وإنهزامى .
أنا: إنت ماسمعتش إللى أجدادنا كانوا بيحكوه عن الغريب وعن إللى كان بيعملوا فيهم.
إبن عمى: إنت ما سمتعتش عن الخناقات إللى راح فيها ناس ياما من عيلتنا .
أخى: ياجماعة الكلام ده كان زمان ، والدنيا إتغيرت .
أنا : مافيش حاجة إتغيرت ، إنت مش عامللى فيلسوف وبتقرا فلسفة وتاريخ ، ما قريتش صاحبك “جان بول سارتر” الفيلسوف الفرنسى الوجودى عندما قال : “الآخرون هم الجحيم ” ، وماقريتش صاحبك سيجموند فرويد فى كتابه عن الحضارة والحرب لما قال: “لا بد من القضاء على الآخر لكى يحيا الأنا”.
أخى: الأنا إيه ووجودية إيه ، إيه التخريف إللى بتقوله ده ، هو معنى إنى قريت كلام سارتر وفرويد يبقى خلاص ضرورى أؤمن بيهم ، ياجماعة شغلوا عقولكم شوية ، ده كلنا أخوة فى الإنسانية .
إبن عمى: سلم لى على الإنسانية ، أهى دى الأفكار إللى بيسمموا عقلك بيها ، يتكلموا عن الإنسانية ، لكن هما لما يعتدوا علينا مايبقاش ضد الإنسانية .
أنا: نهايته ، إسمع ياأخويا ، إنت أخويا الكبير وعلى عينى وراسى ، لكن ضرورى تحدد موقفك ، إنت معانا ولا معاهم ؟
إبن عمى : ولو ماكنتش معانا تبقى معاهم وضدنا .
أخويا : أنا وأخويا على إبن عمى وأنا وإبن عمى ع الغريب!!

samybehiri@aol.com

المصدر إيلاف